Чăваш халăхĕ мĕн ĕлĕкрен юрлама-ташлама юратнă,  тĕрлĕ музыка инструменчĕсем çинче кĕвĕ каланă. Паян Канашри 9-мĕш шкулта та ĕлĕкхи хут купăс, сăрнай, тута купăсĕ, варган  тата шăхлич сасси янăрарĕ. Çак тĕрлĕ музыка инструменчĕсемпе калаканни Тутарстанран килнĕ Султан-ага  пулчĕ. Чи малтанах ачасене пурне те Чăваш чĕлхи кунĕ ячĕпе саламларĕ. Унтан вара Атăл тăрăхĕнче пурăнакан халăхсен юрри-кĕввипе, çак халăхсен культурипе тата музыка инструменчĕсемпе паллаштарчĕ.  Питĕ илемлĕ янăрарĕ хут купăс сасси.  Хут купăсĕ маçтăрăн тĕрлĕрен: пĕчĕкки те, тальянка текенни те, тахçан авалхи чи пĕрремĕш купăс та, хальхи вăхăтри баян та. Сăрнай сасси вара пурне те тыкăнларĕ, икĕ хутчен калаттарчĕç ачасем сăрнайпа Султан-агана. Чăвашла  тата  марилле юрларĕ, тутарпа пушкăрт  кĕввисемпе ачасене ташлаттарчĕ, вырăсла «Калинка-малинка» юрра вара хорпа юрлаттарчĕ пирĕн хăна. Сехете яхăн янăрарĕ шкулта юрă-кĕвĕ. Тĕлпулу питĕ кăмăллă, хаваслă та  интереслĕ иртрĕ.